الزمان ليه إتغير

الفرح ليه جوايا ساكن مابيفرحش.. الحزن ليه جوايا ساكن مابيبكيش.. زمان وأنا صغير كنت بضحك وأبكى ببراءة..دلوقت خلاص الضحك بقى موجوع.. والبكاء جف منه الدموع..الزمان ليه اتغير..السكات ليه سكت جوايا حتى الكلام اللى كان بيتنفسه هوايا بقى مخضوع..
الفرح ليه جوايا ساكن مابيفرحش.. الحزن ليه جوايا ساكن جوايا مابيبكيش..القلب بقى ذى الضباب..مليان هواء كله شوائب..والمشاعر انطفت جواه حتى اللسان ما بقاش مداعب..الزمان ليه اتغير..الحب كان كلمه بتتحس زمان دلوقت متداريه وراء ألف باب..
الفرح ليه جوايا ساكن مابيفرحش..الحزن ليه ساكن مابيبكيش..الدنيا كلها بقت مفارق..اللى رايح واللى جاى من غير مسالك..والأصدقاء مابقاش بينهم حد صادق..الزمان ليه اتغير..الذكريات كمان اختفت ومحتاجه ولا ألف شمس تطلع من المشارق..
الفرح ليه جوايا ساكن مابيفرحش.. الحزن ليه جوايا ساكن مابيبكيش..آه يابشر حتى الخوف مننا خاف..الاخوات وولاد العم مابقاش حد فيهم شايف غير الطمع الشفاف..الزمان ليه اتغير..المصالح بقت طاغيه ولايقدر عليها ألف انسان طواف..
الفرح ليه مابيفرحش..الحزن ليه مابيبكيش..الزمان ليه اتغير..الكلام بقى مخضوع00الدنيا كلها بقت مفارق..الحب متدارى وراء ألف باب..القلب بقى ذى الضباب..الاصدقاء مابقاش بينهم حد صادق..الاخوات وولاد العم فرقت بينهم المصالح..الزمان ليه اتغير...

حبه حبه.. تاتا تاتا

حبه حبه وخطوة خطوة فى الحب نعدى سوى تاتا تاتا..المشاعر جوانا تبقى ذى الطفل وهوبيكبر..والاحساس لبعيد يسافر يسافر00والحب فينا يعافر يعافر..
حبه حبه وخطوة خطوة فى الحب نعدى سوى تاتا تاتا..والعصافير حوالينا تزقزق.. ونبض الوريد جوانا يسرى والقلب يفضل يدق.. والحكاوى علينا تحكى من ساعه ما الفجر يشقشق..
حبه حبه وخطوة خطوة فى الحب نعدى سوى تاتا تاتا.. والحياه بينا تفرح..والحزن نبعد عنه يبقى أريح وأريح.. ومن نظرة عين نفهم بعض وبخيالنا نسرح ونسرح..حبه حبه وخطوة خطوة فى الحب نعدى سوى تاتا تاتا..

ولاد الملاعين

قدم طلب فى درج الوزير بيسأل فيه ايه المصير.. وحكايته كانت حكايه تخلى العقل يطير.. وهنحكى حكايته واللى يسير يسير.. حكايته حكايه كل إنسان فى وطنا مطحون .. كان بذره إتزرعت فى الأرض من أجدادنا وخلعوها ولاد الملاعين .. كان بسمه مرسومه على الشفاه وقتلوها فوق الجبين..

ليل الخوف

فى ليل الخوف روحى حواليك بتطوف00فى نهار النهار عنيا حواليك زنهار00ليل ونهار قلبى سايبه معاك00طيب ليه انت مخطوف ومحتار..

رسمتك فوق جبينى

رسمتك فوق جبينى00ورسيتك جوه قلبى00وعشقتك عشق الصبح بدرى للندى00واتمنيتك تكونى ذى أمى تخافى عليا م الهوى000امضاء00قلب محتاج دواء

ماتيجوا نلعب إستغمايه

فى الحلم بنتكلم00وفى الحقيقه بنتآلم00وأدينا بالقلم بنتعلم00إزاى الخوف اللى جوانا يتكلم00سواء كان فضفضه كلام 00طقطقه دماغ 00مناقيش لسان00المهم أهو كلام وخلاص بيتقال من القلب حتى لو من غير كلام000 **** بمناسبه مولد الأعياد المهطوله علينا من كل مكان بمناسبه ومن غير مناسبه امبارح مولد مئويه الأهلى وبعده مولد تعذيب أهالى سيناء قصدى تحرير سيناء وبعده مولد تشريد العمال أسف عيد العمال والمفاجأة المولد الكبير عيد ميلاد الرئيس قاهرالأمان ومدد مدددددددددددددددددد00وأيضا بمناسبه الحياه الشفتشى المعجونه بالرفاهيه اللى بنعيشها والديمقراطيه المتغمسه بالحريه اللى بنتمتع بها00قررت كتابه موضوعى اليوم وأنا مستخبى فى حلم من تأليفى واخراجى وبطولتى00 قال خير الله ما أجعله خيربحلم انى واقف فى المكان اللى كنت بتجمع فيه مع أصدقاء الطفوله وبنادى عليهم بكلمه السر اللى بينا وأقول أغوغا غوغا واتجمعنا ذى كل مرة وقلتلهم ما تيجوا نلعب استغماية000!!!قالوا ماشى فغميت عنيا وأنا بقول بمبه واحد 00بمبه اتنين00 بمبه تلاته00 وهما بيجروا ويستخبوا00وفجأة قررت أخرج من الحلم وأحكى عن الخفافيش اللى كل يوم بتزود التلطيش والناس ياعينى غلابه عايزة تعيش00بتصحى الصبح بدرى تجرى ورا لقمه العيش00لكن بترجع بسرعه خايفه من الخفافيش00خفافيش00خفافيش خفافيش ورا خفافيش عم حسين وعم درويش موظفين على أول الشهرتلاقى جيبهم منفوش00وفى خمسه منه تلاقى جيبهم منقوش ومفهوش00وبرغم كده تلاقيهم بيضحكوا ويقولوا أهو أحسن من مفيش00خفافيش00خفافيش00خفافيش ورا خفافيش والشعب طيب قوى وبيقول الفرج بكره جاى قريب والغمه تاخد الخفافيش00لكن الحاله تغيرت والأمور تطورت والخفافيش قربت ومن الشبابيك دخلت وربعت وعايزه على كل حاجه تكوش ومش لاقيه حد يلمها ولا خايفه من أى تهويش00والناس من طيباتها بتنادى وتقول الحق ياشاويش00الحق ياشاويش 00ومتعرفش ان الشاويش هو ابن ال 0000000!!!!!! خفافيش00خفافيش00 خفافيش ورا الخفافيش الحق ياشاويش00000!!!!! وفجأة سمعت صوت خفافيش بتقرب منى فجريت بسرعه ودخلت جوه الحلم من تانى وبأقول لأصدقائى خلاويص00يردوا عليا ويقولوا لسه00خلاويص00لسه00خلاويص 00لسه ..